Skriv ei scenetilvising med utgangspunkt i teikninga. Ta med opplysningar om kvar scena utspeler seg, kven som er med, korleis dei ulike personane står oppstilte, korleis dei er kledde, osv.
På kva måtar kan teikningar vere nyttige når de planlegg eit skodespel? Kor viktig er det at teikningane er pene?

Mål med aktiviteten: De skal teikne skisser av scener i eit skodespel for å få fram korleis plassering av skodespelarar, rekvisittar og kulisser kan formidle og forsterke ein bodskap.

Runde 1: Lag skisser til scener i eit skodespel

Gå saman i par.
Finn fram A4-ark og skrivesaker.
Trekk eit situasjonskort. Skriv teksten på situasjonskortet nedst på eit A4-ark.
Diskuter korleis situasjonen som er skildra på situasjonskortet, kan overførast til ei scene.
Teikn to situasjonsbilete med utgangspunkt i det same situasjonskortet. Lag éi teikning kvar, men bli einige om kven som skal teikne kva:
- Dei to teikningane skal illustrere ulike hendingar i den same handlinga:
  - Nokre element skal vere like på dei to teikningane (f.eks. kulisser).
  - Andre element skal vere ulike (f.eks. plasseringa og kroppsspråket til skodespelarane).
- Begge teikningane skal vise eit totalbilete av scena (ikkje nærbilete).
- Bruk berre den øvste delen av arket til å teikne. Den nedste delen held de av til tekst.
Skriv scenetilvisingar i ein parentes under teikninga. Beskriv eventuelle detaljar som er viktige. Beskrivingane kan for eksempel gjelde
- kulisser
- rekvisittar
- kostyme
- bruken av lyd og lys
- plasseringa til skodespelarane på scena
Skriv ei replikkveksling mellom to eller fleire av figurane på teikninga. Skriv replikkvekslinga slik at namnet på rollefiguren som seier replikken, er plassert til venstre for sjølve replikken.
Trekk eit nytt situasjonskort og teikn nye scenebilete.

Gjennomfør aktiviteten tre gonger.

Runde 2: Diskuter scenebileta

Set dykk saman med eit anna par.
Presenter først dei to teikningane som de er mest fornøgde med. Forklar for det andre paret korleis teikningane passar saman med situasjonen som var skildra på situasjonskortet.
Skift roller. La det andre paret få presentere to av sine teikningar.
Hald fram med å presentere teikningar for kvarandre til alle teikningane er gjennomgått.
Vel ut dei to teikningane som passar best for ein presentasjon for resten av klassen. Bruk desse kjenneteikna når de vel ut dei to teikningane:
- Det må vere mogeleg å forstå kva teikninga føresteller.
- Det må vere ein tydeleg samanheng mellom teikninga og situasjonen frå situasjonskortet.
Teikningane bør kunne gi andre elevar gode idear når det gjeld scenebruk og bruk av kulisser eller rekvisittar.